الضحك راه فينا
كل عام كنقول إنشاء الله هاد العام غادي يكون احسن من
العام اللي داز
و لكن كل عام كتجيب لينا دوزيم برامج كفس من العم الآخر
كنقول مع راسي و راسي كيقول معايا ( اول مرة كنتافق انا
و اياه سبحان الله) شكون قالهم راه سلسلة العوني ضحكات الناس العام الفائت باش
يجيبوا لينا الجزء الثاني هاذ العام؟ ( عينهم فيا باغين يركبوني السكر واقيلا)
شوفوا الى كنتم مساخط الوالدين و ما كتسمعوش هضرة باباكم
و ماماكم، تفرجوا في عمي العوني و استافدوا من النصائح اللي كي عطيها لينا، القناة
الصغيرة
أمينة رشيد: قالوا لي ايام زمان كان عندك الهمة و الشان
في الراديو و الناس كانوا كي تسناوك بفارغ الصبر، و درتي ادوار زوينة في التلفزة،
و لكن ديما كنسول راسي كيفاش قبلتي بهاذاك الدور (فاتي) في هاذيك التخربيقة
(العوني)؟ واش من قلة الفلوس؟ و لا عندك الكريدي ديال الدار؟ ولا شي طوموبيل
جديدة؟ ولا أشنو؟ ( هالعار الى ما قوليلي السبب راه غادي يطرطق فيا العرق )
سهام أسيف : ما عرفتش علاش كي جيني الإحساس أنك شاركت
معاهم غي على ود هادوك القفاطن و الجلالب، عمرك شفتي شي مغربية عندنا كتلبس
الجلابة في الدار؟
سعيد الناصري : خاصك تمشي ترتاح واحد العشرة و لا عشرين
عام، على بال ما يرجع ليك المزاج ( واخا عمره ما كان عندك ) ، انت قابط السلسلة غي
بوحدك كاتبها و مثل فيها ولا باش كتعجبوني في الجنريك كاتبين هاذيك "خلية
الكتابة" ، شفتي كون جبتي غي شي واحد من الزنقة كون كتب احسن من هاذاك الشي
اللي درتوا ولا المعارفة زوينة ياك؟
دوزيم راه الضحك فينا، كون غي عطيتوا لهادوك الناس مساكن
اللي ما خدامينش ورقة و ستيلوا كون كتبوا احسن من هاداك الشي اللي كتديروا
الى كنا كنخلصوا الضريبة ديال التلفزة غي على ود هاذ
اللعب ديال الدراري الصغار، غي خليوني بلا تلفزة، ما عندي ما ندير بيها