mardi 25 septembre 2007
عبروا في صمت
كنقول لسيادتكم مبروك
و لكن سمح ليا آ سيدي نقول ليك، أنا راه ما كنعرفكش شكون
انت، ولا فين كبرتي ولا فين قريتي، و بصراحة ما كيهمنيش نقلب موراك
و لكن سيادتكم :
راه ماشي انت اللي كتفطر بالخبز و اتاي و كتغذى بالخبز و
اتاي و بعض المرات في العشا الخبز حرفي ولا اتاي بوحده ولا كتنعس بالجوع
راه ماشي انت اللي عندك الدراري و كتشري لهم لابسة، واحد
فيهم كي لبس السروال و الآخر كي لبس التريكو و الآخرين كي تسناو نوبتهم باش يستروا
ما ستر الله
راه ماشي انت اللي عندك الدري كي قيل يشم في النونوسة
باش ينسى الهم – النونوسة سيادتكم هي ميكة كحلة و فيها السليسيون
راه ماشي انت اللي عندك ولدك مريض بالسرطان و كتبقى تفرج
فيه كيموت لاحقاش ما عندكش باش تديه للمستشفى، و ماشي انت اللي عندك ولدك مريض
بالصدر لاحقاش في ايام البرد ما كيلقاش ما ياكل ولا ما يلبس ولا حتى كاس ديال
الماء سخون يدفي له صدره
راه ماشي انت اللي ساكن في براكة و كتمشي عند با محمد
مول الحانوت تاخذ جوج روزات و جوج زيتونات، روزة ليك و روزة المدام و زيتونة ليك و
زيتونة للمدام و ما تنساش ايام الشتاء تدير بانيو فين يقطر الماء من فوق القصدير
راه ماشي انت اللي كتكون عندك برماننس ( نوبة الخدمة
بالليل) و كتخاف تخرج من دارك لا يتلقى ليك شي مسخوط كي قلب على خمسة دراهم باش
يشري ما ياكل ولا باش يشري طرف الحشيش، و يقدر يقتلك على ود هاديك الخمسة الدراهم
و قلب هاديك الساعة على اللي يعيل ولادك
راه ماشي انت اللي قريتي حتى شاب راسك و درتي نظارات قاع
الكاس و ناض الخرشف في الطاولة و في الآخير مازال كتقلب على خدمة و كتسنى الوالد
ديالك يعطيك 10دراهم من العيد العيد باش تمشي الحمام تكمد عظيماتك
راه ماشي انت اللي ....0
شفتي سيادتكم راه هادو هما الناس اللي كنعرف انا
سمح ليا سيادتكم الى تقبحت عليك في الهضرة
و لكن عندي سؤال محيرني ، كيفاش سيادتكم غادين تحلوا هاذ
المشاكل كاملة و انتما ما قدرتوش تحلوا مشكلة النجاة؟
Commentaires
واخا عليك انيمة
انيمة
اااخ منك يالعفريته
سبقتيني لهاد الفكرة وان كنت انا قد اعتزمت ان اكون اكثر شططا في التوجه الى من هو اعلى ممن توجهت له انت
كان يمكن لهذه المقالة التي كتبت ان تمتد عشرات الصفحات لان ما يمكن ان يكتب كثير جدا لكنك انتقيت من ذلك فأجدت
لا اعتقد ان حضرته سينجح في ان يأتي بم فشل في الاتيان به الاخرون لكن ذلك لن يجعلني احرمه من وصفي الدائم بانه رشيد في الحكومة الرشيدة
اشد على يديك انيمة وتمنياتي لك بكل العز والاكبار
تحياتي
الطيب
سلام
سلام
فكرتيني فواحد المسرحية شفتها شحال هذي عنوانها: عبروا في صمت
ويمكن كاين شي فيلم عندو نفس العنوان
ولكن باين هدوك لي ف صفرو مادارو بالنصيحة
Anima ... M. Abbas va continuer son rôle de ministre d'État de parade! Les grandes décisions sont prises ailleurs !
الصمت حكمة لكن ..ا
لا اعتقد ان وزيرا نال من السخرية واللعنة مثل نصيب عباس الفاسي..ويقال انها فرصة له لاصلاح الفضيحة التي سترافقه الى يوم الدين(والعهدة على المعبرين جهرا)ا
سلام وخلاص
مينتو
والعروسة والمرضية
عباس الفاسي ليس إلاّ موظف حكومي سيأتمر بأمر مديره وسينفذ كما الذي سبقوه في التاويزاريت وهذا مايسمى بمسرح العرائس إذ لابد للعروسة من محرك حتى تؤدي دورها
وعواشركم مبروكة
wa lfassssssssssi
toma ba3do mane al fassi we baraka mane al hssad rah 3ando f9ih shih bazaf rah jab lkorssi mane 3and lhawata we sayada rah homa ali hazoh fi election we hoa dima naji mane najat alah yekamal 3lihe.
hani2ane lana bi al fassi we 3a2ilto we hani2ane lana bihome.
daba rah al fassi hoa baha rah lmalik le roi et 9olbo hhhhhhhhhhhhhhhhhhhhhh dara lih fasokhhhhhhhhhhhhhhhhhh
Excellent
Excellent franchement il faut vraiment poster cette lettre à Ssi 3bibis! :)))
Chapeau la miss :)
كيف بينا ان يعالج احد مشاكلنا وهو لا يعرفها
شكرا لك انيمة على هذا الطرح الرائع انا صراحة لم اكن ادخل الى الديوانيات لان لم اكن اتصور ان اجد نفسي يوما بين دوانية احد بنات بلدي تتالق في سماء الابداع الادبي اللهجوي اشكرك كثيرا وان لن يكون لي مرسى الا في التعليقات على مواضيعك شكرا جزيلا على هذا الطرح
Poster un commentaire
Rétroliens
URL pour faire un rétrolien vers ce message :
http://www.canalblog.com/cf/fe/tb/?bid=71341&pid=6328078
Liens vers des weblogs qui référencent ce message :