واش نسيناهم؟
واش نسينا بوعلام و المحافظي؟
الأول : شفتي بوعلام و المحافظي اللي اختطفتهم القاعدة في العراق؟
الثاني : قالوها ليا
الأول : قالك غادي ينفذوا فيهم حكم الله و غادي يعدموهم
الثاني : حكم الله؟ الله دارهم وصيين علينا؟
الأول : في العوض لا يمشيوا يحرروا فلسطين و يحلوا مشكلة سوريا مع أمريكا جالسين كي قتلوا الأبرياء
الثاني : عندك الحق, آجي آشنو مشكلة سوريا مع أمريكا؟
الأول : ما في خباركش؟
الثاني : لا
الأول : ما كتفرجش في الأخبار؟
الثاني :لا, طلعات ليا في الراس, فينما كانشدها كنلقى " 10 قتلى في العراق , 5 جرحى في فلسطين..." طلع ليا الزعف خوتنا كي موتوا و احنا كنتفرجو
الأول : ايوا دابا راه جات نوبة سوريا. آشنو بغايتينا نديروا راه ما في ادينا والو
الثاني : هاداك الشي اللي كنقول حتى أنا, و أنا نقلب الجلدة
الأول : كيفاش؟
الثاني : وليت عاطيها غير للقنوات ديال الموسيقى
الأول : و في رمضان آشنو كنت كاتدير؟ كنت كاتفرج في هادوك اللي كيغنيو بلا حوايج؟
الثاني : لا راه كنت حابسها في رمضان, قلت مع راسي آجي نتفرج في القنوات 1 و 2 ديالنا ساعة لقيت مهزلة
الأول : ما تفكرنيش في هادوك البرامج, بغايت نعرف واش شايطين عليهم الفلوس حتى لهاد الدرجة؟
الثاني : ايوا آ سيدي طالعة ليهم غير هما, يجيوا يضحكوا علينا بجوج ديال الكلمات و يديو رزمة ديال الفلوس
الأول : قول رزامي ديال الفلوس. ياله نديوها في خدمتنا باش نديوا جوج ريالات في الآخر ديال الشهر راه بان ليا المدير جاي
الثاني : عندك الحق